مشاعر متلخبه وحاجات تايهه ...........!!!!!!

حاسه من فترة انى غريبه اووى .. وفى احساس غريب ومختلف

شايفه حاجات كتير حواليا متلخبطه .. وجوايا حاجات اكتر مش فاهمها

وافكار غريبه بتظهر وتختفى ... افكار بفكر فيها كتير ...

انا لما بكون خايفه ومحتاجه انى اعيط بحاول اضحك وابتسم لكل حاجه حواليا

واهزر واعمل حاجات غريبه واتحرك كتير .. يعنى ممكن علشان دموعى مش تنزل قدام حد

النهارده كنت بفكر .. تفكير عميق وبتركيز رهيب .. تفكير ممكن يجيب اكتئاب ..!!

بس فعلا كنت مشغوله باكتر من فكره جوايا ..

فكره المقارنه .. اه انك تلاقى نفسك حد بيقارنك بحد تانى مش زيك ولا احسن ولا اقل منك بس بقارنك

يعنى مثلا وانا ضغيره كانت ماما بتقارنى بولد فى الشارع كان فى سنى وبياخد معايا دروس

كنت بكره الولد دا جدا .. لانى بكره ان حد يقارنى ....

لكل انسان نقطه تميز يعنى فكره ان حد يقارن ابنه بابن حد تانى انا شايفه انها غيبه وغلط ...

مش عارفه بفتكر حاجات وبفكر فيها كتير ......

........

فكره النتيجه اللى هتظهر الاسبوع اللى جااى ...

من اكتر الحاجات اللى بجد مش قادره افهمها ليه كل سنه الاوائل على الجمهوريه يطلعوا فى التلفزيون

واكتر حاجه بجد تغيظ تلاقى الاب والام مجمعين الاولاد علشان يتفرجوا عليهم

لو فى حد فى ثانويه عامه مش جاب مجموع كبير زيهم لازم ان الاهل يقارنوا بينهم ويحسسوا الواحد انه فاشل درجه اولى

..... يااااه بلد غريبه .. كل ما فاكر فى النتيجه اعيط واتخنق .. يارب .. يارب

.........................

من الافكار اللى برضوه مش قادره انى استوعبها احيانا .. واحياينا تانيه بحاول انى مش افكر فيها !!

منها على سبيل الافكار التى ليس لها حصر .......

احيانا يمر الانسان بمواقف صعبه بيحتاج يلاقى فيها حواليه ناس معينه ..

لو مريت بالموقف .. ولاقيت نفسك لوحدك .. واللى انت كنت منتظر منهم يكونوا جمبك مش موجودين

وكنت حاسس انهم هيقفوا جمبك واتخلوا عنك !! وطال غيابهم !! وطال انتظارك !!

مع العلم .. ان فى وقت من الاوقات كانوا اقرب الاقربين اليك

كانوا من الناس اللى انت حبيتهم بجد وحبيتهم فى الله بجد ...

فجاه وفى الوقت اللى انت محتاجهم فيه ..مشوا وكملوا حياتهم ..

وكانهم نسينك تماما .. ولا كانك كنت معاهم فى يوم من الايام

والا كان حقوق الاخوة بتفرض نفسها وقتها ..

المشكله .....

انك مش قادر تنساهم .. ومازالت بدور على سبب وعذر تلتمسوا ليهم !!

.......

دول كانوا كام حاجه من الحاجات المتلخبطه جوايا

واللى بفكر فيهم .. وفى نص التفكير بقول لنفسى .. ايه ...من ايه دا ؟!

يعنى مجرد محاوله منى لعدم الاكتئاب بسبب افعال الاخرين

او صدمتى فيهم ....

خصوصا لما يكون الاخرين دول من الناس اللى اثروا فى حياتك .. وكمان اثرهم ايجابى وغيروا فيك الى الاحسن

واللى مازالت تكن لهم الكثير من المشاعر الطيبه والود والمحبه ....

افكار ومشاعر وحاجات لسه متلخبه جوايا ...

لينطلق لسانى ويهتف قلبى .. يارب .. يارب .....

Gehad Mousa

احساس وشعور صعب .......

اوقات كتير بنكون محتاجين حد يسمعنا ويكون معانا 

يشاركنا اوجاعنا واحزانا 

حد نحيكله ونشكيله ..حد نرتاحله ونحكيله  عن مشاكلنا وهمومنا 

بس صعب ..اه صعب نلاقى حد مش لان احنا مش عارفين حد 

لان احنا بندور كتير ومش بنلاقى فى الاخر الشخص دا ...وبينتهى بالفشل

وبيجى احساس ان احنا لوحدنا 

عدنا اصحاب كتير والحبايب حولينا ..بس مش فاضينلينا ...

الاحساس بالوحده صعب ومؤلم وبالذات لما بتكون محتاج حد يكون جمبك ويسندك ويحس بيك ويفرحك 

بس بالرغم من كل دا بينتجاوز الاحزان والالم والاوهام ...

وبنرجع تانى نعيش اصل عمر ما الدنيا هتقف غير يوم القيامه

واوقات تانيه بنكون محتاجين نقعد لوحدنا ..

ممكن علشان  نفهم حاجات كتير بتحصل معانا ... ونرجع نرتب حياتنا 

و علشان نصالح نفسنا ونبعد عن الناس ولو شويه صغيرة 

بس صعب الدنيا على طول زحمه حواليك وناس كتير كلهم حواليك

مش عارف حتى تمشى وتسيبهم ..وانت المره دى مش عاوزهم ..

مش عاوز حد يشاركك همومك و احزانك ....

الحد دا بيكون جواك انت

الحد دا هو نفسك

لما الاحساس بالوحده بيلح عليك بقوة والرغبه فى البعد عن الناس والحياه هو اقوى شعور عندك ..

انك تكتشف انك عشت حياتك مع ناس كتير وساعدت ناس كتير واتعرفت على ناس اكتر واكتر

بس فى شخص واحد بس تعمدت انك تتجاهله تبعد عنه وبكل كبرياء وغرور والاهمال عاملته ..

شخص رائع .. شخص صبور .. شخص جميل 

طلب كتير انه يقرب منك ويكون جمبك وانت كنت بتبعد عنه حتى الكلمه الحلوة حرمتها منه ..

شخص حاول بجد وبقوه واكتر من مرة انه يقولك " انا اهم واحد فى حياتك كلها " 

لو عمل حاجه صح اعتبرت دا منه صدفه واتعملت غلط ولو حاجه غلط عقابته بدل المرة الف وبعدت اكتر عنه 

والصح اللى عمله حتى مش فكرت تقوله عليه صح وجيد او حتى كلمه حلوة ...

الشخص دا هو انت ..نفسك 

لما تقرر انك انت وهو تسافروا لمكان بعيد لوحدكوا ...بيعد عن كل حاجه ..الناس والمشاكل ..بل ابعد ..ببيعد عن الحياه 

بس تكتشف انه كان قرار صعب .. له صعب تبعد اووى ..صعب تسافر ..

لان فى ناس بتحبهم وماتقدرش تبعد عنهم ..لانهم محتاجين ليك 

يعنى تقول لنفسك لو انا حسيت احساس صعب لما مش لقيت حد جمبى .. وتكون مش عاوز تخلى حد يحس الاحساس دا بعدك 

لانك عرفت طعمه المر ...واحساسه الوحش 

تلاقى نفسك تقف وتبتسم وتقول " صعب نبعد ..بس فى معاد بينا ... معاد بينى وبينك ...."

بس هيكون معاد بيعد عن كل حاجه ..لا واكتر ..بيعد عن الحياه

وقتها هتلاقى نفسك بتقول 

"انت اعظم شخص فى الدنيا دى "

Gehad Mousa

سفر فى وقته الصح .........

زى كل مرة اقول هكتب كل يوم فى المدونه وعملت المدونه دى علشان اكتب فيها حتى لو كلمه صغيرة بس برضوه 

مش عملت كدا ... بس كان فى نيتى انى استمر بس اضطرت اسافر عند جدتى بضعه ايام .. ولم اجد هناك نت ولا كمبيوتر

بس خير ان شاء الله استمر فى الكتابه على امل انى استمر واكتب كل يوم ....

النهارده رجعت من السفر ... الحمد الله 

كانت الايام شبه بعض ,,كل يوم زى اللى قبله بدون تغير او تجديد بس كنت محتاجه الجو دا فعلا 

محتاجه اكون لوحدى وابعد عن كل حاجه شويه .. حاجات كتير كنت محتاجه افكر فيها 

قدام بيت جدى طريق القطار بحبه اووى وبقف فى البلكونه كتير اشوفه واتبعه وهو جاااى وهو ماشى لحد 

ما يبعد عن نظرى خالص ... 

ولما رحت عند خالتى ايام قليله لزيارتها كنت بقف فى البلكونه وكان قدامها قهوة لا قهوتين ..

وشارع كبير فى ناس كتير بحب لقف اتفرج عليهم .. الشارع على طول فى ناس طول اليوم الفجر والنهار وبليل 

بس لكل وقت طعم و ريحه جديده وبشوفه بعين جديده ...... حاجه كدا 

اكتشفت حاجات كتير اووى حصلت معايا وانا هناك وتصرفات غلط عملتها وتصرفات صح 

عرفت ارتب افكارى وحاجات تانيه كتير كانت متلخبطه .....

كنت محتاجه الوقت دا ... والسفر المرة دى كان فى معاده و وقته 

رغم انى سافرت السنه اللى فاتت فى نفس الوقت بس كنت مسافرة علشان حاجه ... بس رحت علشان خاطر ماما 

بس الحمد الله على كل حال .... سنه مرت وسنه تانيه جايه وسنين كتير بتمر علينا 

لازم يكون فيها حاجه حلوة .. كلمه حلوة .. وحب جديد .. نظرة صادقه .....

النهارده قرات الاجنده بتاعتى كلها ... والغريب انى عيطت فيها وتعبت وانا بقرا وكنت بمسح الدموع من على الورق 

مش من على وشى ... بس كنت مبسوطه بكل حاجه ......

يا الله .... يا الله .....

خير ان شاء الله ............................

Gehad Mousa

يوم .......

يااااااااااااااه وصلت المحله النهارده كان الطريق فيه حاجه حلوة وحاسته جديد رغم انه كان عادى و زى كل مرة بس المرة دى كان فى احساس حلو كدا وجميل .. رغم انى كنت ناويه اسافر من مده وكل مرة السفر يتاخر ولكن الحمد الله جيت ... رتبت حاجاتى وكلها و برضه فى الاخر نسيت اخد دفتر مذكراتى او على الاقل ورقه وقلم يكونوا معايا ولا والاكتر انى نسيت انى اخد كتاب معايا ....بمعنى اخر نسيت اخد اساسيات الشنطه ..مش عارفه انا افتكرت ايه ....كله خير ان شاء الله .....
و لقيت دفتر وقلم مع اختي ...بدات اسجل كل افكارى وكل حاجه .....
رحت لخالتو قعدت شويه ورحت لجدتى الحمد الله كل حاجه عدت بسرعه وبخير الحمد الله 
ممكن يكون اليوم فيه احداث كتير .......بس فيه حاجات على الهامش كدا مش مهمه لا حاجه الى ذكرها ....
الخمس حاجات كويسه عملتهم النهارده :
1 - صليت الفجر 
2- ساعدت فى البيت 
3- زرت خالتى وجدتى وخالى و جبت ورد لخالتى 
4-................
5-.........................
ممممممم مش عارفه فى كلام كتير بس انا تعبانه ..........................

Geehad Mousa 

وعدت ..................^_^

اخيرا ... من ومان مش كتبت هنا رغم ان كان فى حاجات كتير نفسى انقلها هنا يعنى لان المدونه دى كنت عملتها 

علشان انقل فيها الحاجات والكلمات اللى بتعجبنى و مش اكون انا اللى كتبتها وفعلا بدات فيها بحماس كبير بس للاسف انا وقفت ومش اهتميت بها خالص الفترة اللى فاتت ولا نزلت فيها حاجه جديده ... الحمد الله على كل حال 

النهارده قررت انى اغير اسمها و هدفها يعنى بدل خواطر قلم 125 تكون يومياتى 125 واكتب فيها يومياتى 

اصلى اكتشفت انى بطلت اكتب يومياتى فى دفترى بانتظام يعنى لما بفتكر .. 

بس نويت اسجل هنا يومياتى ممكن علشان بالنسبه ليا انى اكتب على الكمبيوتر اسهل بكتير من الدفتر رغم انى بحب الورق و الدفاتر والكتب الورق ... بس يعنى النظر للسهوله والسرعه ليس بمضرة .... تجديد ليس اكثر 

انا نويت اكتب كل يوم حتى ولو كلمه صغيرة يعنى حاجه تعبر عن اليوم مش اكتر 

في حاجه مرة سمعتها وعجبتنى اووى وكنت ناويه انفذها هى انى امسك كل يوم ورقه واكتب خمس حاجات كويسه انا عملتها اليوم دا 

واشوف بعد اسبوع الحاجات دى ببتغير وببكتر ولا بتقل .....انا هجربها هنا كل يوم  .....

ان شاء الله ........

هى المدونه دى اكيد هتكون بالعاميه لانها يوميات وكمان علشان اكتب اللى فى دماغى بدون ترتيب ولا تنظيم اكتبه كله 

اتاخرت فى العوده للمدونه دى واهملتها ولكنى رجعت واتمنى الانتظام ......................

Gehad Mousa

دولار

دخل صبي يبلغ من العمر 10 سنوات الى مقهى.
وجلس على الطاوله ، فوضعت الجرسونة كأساً... من الماء أمامه.
فسئل الصبي : بكم آيس كريم بالكاكاو ؟
أجابته : بخمس دولارات.
فأخرج الصبي يده من جيبه وأخذ يعد النقود.
ثم فسألها مرة أخرى : حسنا ً، وبكم الآيس كريم لوحده فقط بدون كاكاو ؟
في هذه ِ الأثناء كان هناك الكثير من الزبائن ينتظرون خلو طاوله في المقهى للجلوس عليها.
فبدأ صبر الجرسونه بالنفاذ ، فأجابته بفظاظه : بـأربع دولارات.
فعد الصبي نقوده وقال :سآخذ الايس كريم العادي.

فأحضرت الجرسونة له الطلب ، ووضعت فاتورة الحساب على الطاولة وذهبت.
أنهى الصبي الآيس كريم ودفع حساب الفاتورة وغادر المقهى.
وعندما عادت الجرسونة إلى الطاولة إغرورقت عيناها بالدموع أثناء مسحها للطاوله.
حيث وجدت بجانب الطبق الفارغ .. دولار واحد.

لقد حرم الصبي نفسه الآيس كريم بالكاكاو حتى يوفر لنفسه دولارًا يكرم به الجرسونة.

............................

كثيرا ً مانقع في حرج أو نتسبب في شحن نفسي تجاه أناس آخرين نحمل لهم الكثير من الحب والتقدير
ولكن الإستعجال بإصدار حكمنا عليهم يتسبب في فهمهم بشكل خاطئ.

فـكما رأينا الجرسونة نفذ صبرها لأن الصبي أخذ يبدل رأيه بين الآيس كريم العادي أو بالكاكاو وظنت به ِ ظن السوء.

دائما ً نتسرع بأتخاذ مواقف نجدها لاحقا ً خاطئة ، لا نملك الصبر ولا نعطي مساحة للغير في الكثير من المواقف في الحياة سواء ً في العمل أو في المحيط العائلي أو في محيط الحب.

قال سيد الخلق صلى الله عليه وسلم :
( إياكم والظن ؛ فإن الظن أكذب الحديث )/ متفق عليه

وقال ابن سيرين : " إذا بلغك عن أخيك شيء فالتمس له عذرًا ، فإن لم تجد فقل : لعل له عذرًا لا أعرفه "امشاهدة المزيد


يارب ألهمنا حسن الظن

ابتسم

ابتسم:عندما تجلس مع عائلتك .. فهناك من يتمنى عائلة ..
ابتسم عندما تذهب إلى عملك ..فالكثير ما زال يبحث عن وظيفة ..
ابتسم : لأنك بصحة وعافية .. فهناك من المرضى من يتمنى أن يشتريها بأغلى الأثمان ..
ابتسم : لأنك حي ترزق ..فالأموات يتمنون الحياة ليعملوا صالحا
ابتسم ..لأنك أنت،،،،،، هو أنت.........وغيرك يتمنى أن يكون هو أنت..
ابتسم فسبحان من جعل البسمة صدقة تؤجر‬